January 2, 2019

ઈ.સન 2019 વાર્ષિક રાશિભવિષ્ય

નવવર્ષ 2019ની શરૂઆત થઈ ચૂકી છે. અંકશાસ્ત્ર અનુસાર 2019ના અંકોનો સરવાળો કરીએ તો 2+0+1+9 = 12 = 1+2 = 3 આવે છે. અંક 3 ગુરુ ગ્રહનું પ્રતિનિધિત્વ કરે છે. એટલે કે વર્ષ 2019 ગુરુ ગ્રહનું પ્રભુત્વ ધરાવનારું રહેશે. જ્ઞાન અને ડહાપણનો કારક ગ્રહ ગુરુ દૈવીય રક્ષણ પૂરું પાડવા સક્ષમ છે. વિદ્યા, વિવેક અને ધર્મનું આચરણ પ્રાથમિકતા બની રહે. ગોચર અનુસાર વર્ષ 2019માં ગુરુ વધુ સમય પોતાના મિત્ર મંગળની રાશિ વૃશ્ચિકમાં ભ્રમણ કરશે. નવવર્ષનો પહેલો દિવસ પણ ગુરુના મિત્રનો દિવસ મંગળવાર જ છે !! ગુરુની બે રાશિઓ ધનુ અને મીન રાશિના જાતકો માટે વર્ષ 2019 મહત્વપૂર્ણ બની રહેશે. તે જ રીતે કોઈ પણ મહિનાની 3, 12, 21 કે 30 તારીખોએ જન્મેલા જાતકો માટે પણ વર્ષ 2019 મહત્વની ઘટનાઓ ઘટાવનારું બની શકે છે. બારેય રાશિઓ/જન્મલગ્ન માટે વર્ષ 2019 કેવું રહેશે તે જોઈએ.

મેષ: વર્ષ 2019 દરમિયાન ભાગ્ય અવરોધાતું જણાય. નોકરી-વ્યવસાયમાં બદલાવ કે બદલી શક્ય બને. આજીવિકાની પ્રાપ્તિમાં અવરોધ કે વિલંબનો અનુભવ થાય. આવકમાં સ્થિરતા બની રહે. મહેનતનું પરિણામ વિલંબથી મળતું જણાય. વર્ષની શરૂઆતમાં આરોગ્યની કાળજી રાખવી જરૂરી બને. રોગથી બચવા માટે રહેણી-કરણી અને ખાન-પાનમાં વિશેષ કાળજી રાખવી. નવેમ્બર માસથી ધીમે-ધીમે રોગોથી મુક્તિ મળવાની શરૂઆત થાય. વારસાગત ધનલાભ થવાની શક્યતા રહે. ભાગીદારીને લીધે કે જીવનસાથીને લીધે પણ આર્થિક લાભ થઈ શકે છે. ઓક્ટોબર સુધી સમજી-વિચારીને ખર્ચાઓ કરવા. પૈસા ઉધાર આપવાથી બચવું. વિદ્યાર્થીઓને કઠોર પરિશ્રમ બાદ સફળતા મળતી જણાય. પરિશ્રમમાં ચૂક નિષ્ફળતાનો સામનો કરાવી શકે છે. ઓક્ટોબર બાદ વિદ્યાભ્યાસમાં આવી રહેલાં અવરોધો દૂર થતાં જણાય. માર્ચ બાદ ઘરમાં સુખ-શાંતિનો અનુભવ થાય. વર્ષ દરમિયાન ધાર્મિક કાર્યો પ્રત્યેની રુચિમાં વધારો થાય.

વૃષભ: નવી વ્યાવસાયિક ભાગીદારીઓ આકાર લઈ શકે છે. આમ છતાં નોકરી-વ્યવસાયમાં ઉતાર-ચડાવનો અનુભવ થાય. કઠોર પરિશ્રમ બાદ નવી યોજનાઓ સફળ થતી જણાય. નોકરીમાં અસ્થિરતા રહેવાની સંભાવના રહે. આરોગ્ય સારું રહે. પરંતુ આંખ કે દાંતના રોગ સંબંધી સમસ્યાઓનો સામનો કરવો પડી શકે છે. બિનઆરોગ્યપ્રદ ભોજન કરવાથી દૂર રહેવું. મેદવૃદ્ધિ થવાની સંભાવના છે. પિતાનું આરોગ્ય ચિંતા કરાવી શકે છે. અપરિણીતો માટે આ વર્ષ દરમિયાન લગ્ન થવાની પ્રબળ સંભાવના છે. પરિણીત જાતકો જીવનસાથી સાથે મધુર સમય વ્યતીત કરી શકે. આર્થિક સ્થિતિ મજબૂત બનાવવા માટે ખર્ચ પર કાબુ રાખવો જરૂરી રહેશે. મહેનત કરવાં છતાં ઈચ્છિત ધનલાભથી વંચિત રહેવાની પરિસ્થિતિ ઊભી થઈ શકે છે. વિદ્યાર્થીઓ અભ્યાસમાં એકાગ્રતાનો અભાવ અનુભવે. જો કે સ્પર્ધાત્મક પરીક્ષામાં સફળતાની પ્રાપ્તિ થઈ શકે છે. શનિની નાની પનોતી ચાલી રહી હોવાથી દરેક કાર્યોમાં વિલંબ કે અવરોધનો અનુભવ થઈ શકે છે. અન્યોની સલાહ અનુસાર ચાલવું હિતાવહ રહે.  

મિથુન: નવી નોકરીની પ્રાપ્તિ થઈ શકે છે. ભાગ્યનો સાથ મળી રહે. નોકરી-વ્યવસાયના ક્ષેત્રમાં પ્રગતિ થઈ શકે છે. મનમાં પેદા થતાં ભય, ભ્રમણા, ડર કે શંકાથી બચવું. આરોગ્ય પ્રત્યે સતર્ક રહેવું. ચિંતા કે તણાવનો અનુભવ થઈ શકે છે. નાભિથી નીચેના અંગોના રોગ સમસ્યા પેદા કરી શકે છે. આમ છતાં રોગ પર કાબુ મેળવવામાં સફળ રહો. કુટુંબજીવનમાં સુખની પ્રાપ્તિ થાય. પરિવારમાં કોઈ માંગલિક પ્રસંગની ઉજવણી થઈ શકે છે. ભૌતિક સુખ-શાંતિની પ્રાપ્તિ થાય. અપરિણીત જાતકો માટે ઓક્ટોબર બાદ લગ્ન થવાની શક્યતા રહે. ઓક્ટોબર બાદ વ્યાવસાયિક ભાગીદારીઓ પણ રચાય શકે છે. લગ્ન કે વ્યવસાયની ભાગીદારી બાબતે સમજી-વિચારીને નિર્ણય લેવો. વિદ્યાર્થીઓને સ્પર્ધાત્મક પરીક્ષામાં સફળતાની પ્રાપ્તિ થાય. અભ્યાસમાંથી મન ભટકે નહીં તેની કાળજી રાખવી. ટેકનિકલ જાણકારી કે જ્ઞાનમાં વૃદ્ધિ થઈ શકે છે. સંશોધનાત્મક બાબતોમાં રુચિ વધે. આ વર્ષ વ્યક્તિત્વનો વિશિષ્ટ વિકાસ કરાવનારું બની રહે.  

કર્ક: નોકરીમાં મહેનત અનુસાર ફળ મળવાની સંભાવના રહે. સફળતા અને પ્રગતિ માટે પુરુષાર્થ જરૂરી બને. ઓક્ટોબર બાદ નોકરીમાં કાર્યો સહજતાથી પૂર્ણ થતા જણાય. વધુ પડતાં વિશ્વાસમાં આવીને ધનનો ખર્ચ કરવાથી બચવું જોઈએ. સહકર્મચારીઓ સાથે વૈચારીક મતભેદ થવાની શક્યતા રહે. નોકરી-વ્યવસાયમાં બદલાવ માટે વર્ષના અંતિમ મહિનાઓ સહાયરૂપ બને. આરોગ્ય પ્રતિ તકેદારી રાખવી જરૂરી બનશે. અન્યથા લાંબો સમય ચાલનારી બિમારીઓના ભોગ બનવું પડી શકે છે. અનિદ્રાની ફરીયાદ રહેવાની સંભાવના છે. ભાઈ-બહેનોને લગતાં પ્રશ્નો ચિંતાનું કારણ બને. લોન લેવા-દેવા માટે વર્ષના અંત સમય સુધી રાહ જોવી હિતાવહ રહે. વિદ્યાર્થી મિત્રોને સ્પર્ધાત્મક પરીક્ષામાં સફળતા માટે વધુ મહેનત કરવી પડે. અભ્યાસ બાબતે કોઈ સારી તકની પ્રાપ્તિ થઈ શકે છે. પરિણીત જાતકોને જીવનસાથી સાથે મતભેદની સ્થિતિ ઊભી થઈ શકે છે. સંતાન કે પૌત્ર-પૌત્રીના જન્મની વધામણી મળી શકે. ધાર્મિક કાર્યો પ્રત્યેની રુચિમાં વધારો થાય.  

સિંહ: મહાત્વાકાંક્ષામાં વૃદ્ધિ થાય. નોકરીમાં પ્રમોશન કે પ્રગતિ થવાની પૂર્ણ સંભાવના રહે. ઉપરી અધિકારીઓ અને સહકર્મચારીઓના પૂર્ણ સહયોગની પ્રાપ્તિ થાય. નવી નોકરી કે નોકરીમાં બદલાવ શક્ય બને. વ્યવસાયમાં વિકાસ પામવાનાં અવસરની પ્રાપ્તિ થાય. વ્યવસાય ક્ષેત્રે નવા જોખમો કે સાહસો ખેડવા માટે આ વર્ષ યોગ્ય છે. માતા સાથે મધુર તાલમેલ બની રહે. નવું ઘર લઈ શકવાની ઈચ્છા આ વર્ષે પૂર્ણ થતી જણાય. ઘરમાં સુખ-સગવડનાં સાધનોની વૃદ્ધિ થાય. સંતાનના પ્રશ્નો ચિંતા કરાવી શકે છે. સંતાન સાથે મતભેદ થવાની શક્યતા પણ નકારી ન શકાય. પ્રણય પસંગમાં અવરોધનો અનુભવ થાય. લાગણીઓને ઠેસ પહોંચવાની સંભાવના રહે. સાથીને કોઈપણ પ્રકારના વચન આપવાથી દૂર રહેવું. વિદ્યાર્થીઓમાં એકાગ્રતાનો અભાવ રહે. અભ્યાસમાં કઠોર પરિશ્રમ આવશ્યક બને. વિદ્યાભ્યાસમાં મુશ્કેલીઓનો સામનો કરવો પડી શકે છે. આર્થિક ક્ષેત્રે નવી યોજનાઓ પર કાર્ય થઈ શકે અને તેમાં સફળતા મળવાની સંભાવના રહે.

કન્યા: ભાગ્યમાં વૃદ્ધિ થતી જણાય. નોકરી-વ્યવસાયમાં પ્રારંભિક મુશ્કેલીઓ બાદ સફળતા મળતી જણાય. કાર્યને લીધે વિદેશગમન પણ શક્ય બને. વર્ષ 2019ના ઉતરાર્ધમાં શ્રેષ્ઠ લાભ થવાની સંભાવના રહે. રોકાયેલાં કાર્યો પૂર્ણ થતાં જણાય. વાતચીત, પત્રવ્યવહાર, સંવાદ અને ચર્ચાઓથી લાભની પ્રાપ્તિ થાય. આરોગ્ય પ્રત્યે સાવચેત રહેવું જરૂરી બને. યોગ્ય ખાન-પાન અને જીવનશૈલી અપનાવવી હિતાવહ રહે. હ્રદય, છાતી કે માનસિક રોગ પીડા પહોંચાડી શકે છે. મન શાંત રાખવું અને હતાશા કે નિરાશાભર્યા વિચારોથી દૂર રહેવું. એપ્રિલ માસ દરમિયાન નવી સ્થાવર મિલક્ત ખરીદી થઈ શકે છે. માતાનું આરોગ્ય ચિંતા કરાવી શકે છે. ઘરના સભ્યો વચ્ચે વાતાવરણ ગંભીર રહે. અપરિણીત જાતકોના આ વર્ષ દરમિયાન લગ્ન થઈ શકે છે. પરિણીત જાતકો વ્યસ્ત દિનચર્યા વચ્ચે જીવનસાથી માટે સમય ફાળવી શકે. ભાઈ-બહેનો સાથે મધુર સંબંધ બની રહે. મિત્રો સાથે સમય પસાર કરવાની તકો મળતી રહે.   

તુલા: આવકમાં વૃદ્ધિ થઈ શકે છે. એકથી વધુ કાર્યો હાથ પર લો તેવું બને. કાર્ય હેતુ વિદેશગમન પણ થઈ શકે છે. ઉપરી અધિકારીઓની સલાહ પર અમલ કરવો હિતાવહ રહે. નવી નોકરી મળી શકે અથવા નોકરીમાં બદલાવ કરી શકાય છે. કુટુંબમાં સુખ-શાંતિનું વાતાવરણ બની રહે. ઘર-પરિવારમાં માંગલિક પ્રસંગોની ઉજવણી થઈ શકે. કુટુંબમાં નવા સભ્યનો ઉમેરો થાય. સ્વાદિષ્ટ ભોજનની પ્રાપ્તિ થાય. સંતાનના પ્રશ્નો ચિંતા કરાવી શકે છે. ભાઈ-બહેનો સાથે મતભેદ થવાની સંભાવના રહે. પિતાનું આરોગ્ય ચિંતા કરાવે. યાત્રામાં કષ્ટનો સામનો કરવો પડી શકે છે. યાત્રા અને ભાઈ-બહેનોને લીધે નાણાકીય વ્યય થઈ શકે છે. વાહન ચલાવવામાં સાવધાની રાખવી જરૂરી બને. વિદ્યાર્થી મિત્રોને પરિશ્રમ બાદ અભ્યાસમાં સફળતા મળતી જણાય. ઉચ્ચ અભ્યાસમાં અવરોધ અને વિલંબનો સામનો કરવો પડી શકે છે. મિત્રો, સગા-સંબંધીઓ અને પાડોશીઓ સાથેના સંબંધો ન બગડે તેની કાળજી રાખવી.

વૃશ્ચિક: નવી નોકરી મળવા માટે અથવા નોકરીમાં બદલાવ માટે એપ્રિલ માસ અને વર્ષના અંતિમ મહિનાઓ વધુ અનુકૂળ રહે. વર્ષના અંતિમ મહિનાઓ દરમિયાન નોકરી-વ્યવસાય ક્ષેત્રે પ્રગતિ થવાની સંભાવના રહે. આવકમાં વૃદ્ધિ શક્ય બને. આ વર્ષ દરમિયાન ધન અને ભાગ્યમાં વિશેષ વૃદ્ધિ થઈ શકે છે. નવા વિચાર અને મૌલિકતા વ્યક્તિત્વને નિખારે. સંતાનનો જન્મ થવાની પૂર્ણ સંભાવના રહે. સંતાનથી સુખ અને સહયોગની પ્રાપ્તિ થાય. શરીરમાં મેદવૃદ્ધિ થઈ શકે છે. માનસિક અશાંતિ મુંઝવણોમાં વૃદ્ધિ કરી શકે છે. પૈતૃક કે વારસાગત સંપતિ પ્રાપ્ત થવાની શક્યતા રહે. વાણી પર નિયંત્રણ રાખવું જરૂરી બને. વિદ્યાર્થી મિત્રોને આ વર્ષ અભ્યાસમાં સફળતા અપાવનારું બની રહે. ઉચ્ચ અભ્યાસની તકોની પ્રાપ્તિ થાય. ગુરુજનોની મદદ અને પિતાની સલાહ ઉપયોગી નીવડે. ધાર્મિક કાર્યો પ્રત્યેની રુચિમાં વધારો થાય. ધાર્મિક સ્થળોની યાત્રા કે મુલાકાત લઈ શકાય. અપરિણીત જાતકોના લગ્ન થવાની પૂર્ણ સંભાવના રહે. પ્રેમમાં સફળતા મળે.

ધનુ: નોકરી-વ્યવસાયમાં પ્રગતિ માટે કઠોર પરિશ્રમની આવશ્યકતા રહે. કાર્યક્ષેત્રે જવાબદારી અને બંધનનો અનુભવ થઈ શકે છે. મહેનત કરવા છતાં સફળતા ન મળવાને લીધે નિરાશાનો અનુભવ થાય. સાડાસાતીનો પ્રભાવ હોવાથી મહેનત કરવામાં પીછેહઠ ન કરવી. વધારે પડતાં કામનો બોજ, થાક અને આરામની ઉણપ સતાવે. આરોગ્ય પ્રત્યે તકેદારી રાખવી જરૂરી બને. ઋતુના બદલાવનો આરોગ્ય પર તુરંત પ્રભાવ પડે. વ્યવહારમાં ઋક્ષતા અને ચીડિયાપણું આવતું જણાય. આર્થિક ક્ષેત્રે મંદ ગતિથી લાભ મળતો જણાય. આવક કરતાં જાવકનું પ્રમાણ વધુ રહે. દાન-ધર્માદા કે શુભ કાર્યો પાછળ નાણાકીય ખર્ચ થવાની સંભાવના રહે. વિદેશગમન શક્ય બને. વિદેશમાં જઈને વસવાટ કરવાની તક સહેલાઈથી આવી મળે. વિદેશ રહેતાં હો તો વતનની મુલાકાત શક્ય બને. વિદ્યાર્થી મિત્રોને વર્ષના અંત સમયમાં મહેનતનું ફળ મળતું જણાય. નવી સ્થાવર મિલકત કે વાહનની ખરીદી થઈ શકે છે. માતાના પ્રેમની હૂંફ મળી રહે.

મકર: મહેનત, નિષ્ઠા અને ઈમાનદારીથી જવાબદારી નિભાવીને કાર્યક્ષેત્રે પ્રગતિ અનુભવી શકાય. આ વર્ષ સંઘર્ષ અને તણાવભર્યુ રહેવાની સંભાવના છે. પૂર્ણ આંતરિક ક્ષમતા, ઈચ્છા શક્તિ અને દ્રઢતાથી કાર્યો પર ધ્યાન આપો તો સફળતાની પ્રાપ્તિ થઈ શકે છે. મે માસ બાદ આવકમાં વૃદ્ધિ થવાની સંભાવના રહે. નોકરીમાં બદલાવ કે સ્થળાંતરણ શક્ય બને. નવી વ્યાવસાયિક ભાગીદારીના પ્રસ્તાવ આવી શકે છે. અપરિણીત જાતકોના લગ્ન થવાની સંભાવના રહે. પરિણીત જાતકોને સંતાન જન્મની ખુશી મળી શકે છે. સંતાન તરફથી સુખ અને સહયોગની પ્રાપ્તિ થાય. ભાઈ-બહેનો સાથે મધુર સંબંધ બની રહે. આરોગ્યના પ્રશ્નો ચિંતા કરાવી શકે છે. સાડાસાતીનો પ્રથમ તબક્કો અનિદ્રાનો અનુભવ કરાવી શકે છે. નિરાશા, હતાશા અને નકારાત્મક વિચારસરણીથી દૂર રહેવું. શારીરિક નબળાઈનો અનુભવ થઈ શકે છે. વિદ્યાર્થી મિત્રોને મહેનતનું ફળ મળી રહે. અભ્યાસમાં અનિયમિતતા દાખવવાથી બચવું જરૂરી બને.

કુંભ: આ વર્ષ દરમિયાન નોકરીમાં પરિવર્તન કે સ્થળાંતર થઈ શકે છે. નવી નોકરી પ્રાપ્ત થઈ શકે છે. નોકરીમાં પ્રમોશન મળી શકે અને સત્તામાં વધારો થાય. જ્યોતિષ, ધર્મ કે અધ્યાત્મ ક્ષેત્ર સાથે જોડાયેલી વ્યક્તિઓને કાર્યોમાં સફળતા મળે. કાર્યક્ષેત્રે પોતાની આવડત દેખાડવાના અવસરની પ્રાપ્તિ થાય. આ વર્ષ કાર્યક્ષેત્રે ટોચ પર પહોંચાડવામાં મદદરૂપ બને. વ્યવહારમાં વિનમ્રતાનો અભાવ અને ચીડીયાપણું દેખાય. ચિંતા, તણાવ અને વ્યર્થ નકારાત્મકતાથી બચીને રહેવું. આ વર્ષ દરમિયાન જીવનમાં પ્રેમનું આગમન થઈ શકે છે. પ્રિયજનનું ધ્યાન પોતાની તરફ ખેંચવામાં સફળ રહો. વિદેશમાં અભ્યાસ કરવા ઈચ્છુક વિદ્યાર્થી મિત્રોને સફળતા મળતી જણાય. અભ્યાસમાં વધારે મહેનત જરૂરી બને. મનગમતાં વિષયમાં પ્રવેશ મળવામાં મુશ્કેલી પડી શકે છે. મિત્રો સાથેના સંબંધોમાં અંતર આવતું જણાય. ભાઈ-બહેનો સાથેના સંબંધોમાં દૂરી આવે કે મતભેદ થવાની શક્યતા રહે. વિદેશથી ધનલાભ થવાની શક્યતા રહે.

મીન: ભાગ્યમાં વૃદ્ધિ થાય. નોકરી-વ્યવસાય ક્ષેત્રે મહેનત બાદ સફળતાની પ્રાપ્તિ થાય. પ્રતિષ્ઠિત વ્યક્તિઓ સાથે ઓળખાણો થવાની સંભાવના રહે. કાર્યક્ષેત્રે વધુ મહેનત અને ઓછો લાભની સ્થિતિ રહે. પ્રમોશન માટે વધુ પ્રયાસ કરવા પડે. ઉપરી અધિકારીઓ અને સહકર્મચારીઓ સાથે સંઘર્ષમાં ઉતરવાથી દૂર રહેવું. વૈવાહિક જીવનમાં મુશ્કેલીનો સામનો કરવો પડી શકે છે. જીવનસાથીનું આરોગ્ય ચિંતા કરાવી શકે. સંતાન ઈચ્છુક દંપતિઓને સંતાનની પ્રાપ્તિ થઈ શકે છે. સંતાન તરફથી સંપૂર્ણ સુખ અને સહયોગની પ્રાપ્તિ થાય. જીવનમાં પ્રેમનું આગમન થઈ શકે છે. ઘરથી દૂર જવાના પ્રસંગો ઉદ્ભવે. સ્થાવર મિલકત ખરીદવા બાબતે તકેદારી રાખવી જરૂરી બને. વિશ્વાસઘાત કે છેતરપીંડી થવાની શક્યતા રહે. શરીરમાં મેદવૃદ્ધિ થવાની સંભાવના રહે. વિદ્યાર્થી મિત્રોને અભ્યાસમાં પૂર્ણ સફળતાની પ્રાપ્તિ થાય. ઉચ્ચ અભ્યાસની તક સહેલાઈથી મળે. પિતાની સલાહ ઉપયોગી નીવડે. ધાર્મિક કાર્યો પ્રત્યેની રુચિમાં વધારો થાય.

નોંધ લેશો કે ઉપર જણાવેલ ફળ સ્થૂળ છે. સૂક્ષ્મ ફળનો આધાર વ્યક્તિગત કુંડળીમાં રહેલાં ગ્રહો પર રહેલો છે. 

October 11, 2018

ગુરુના વૃશ્ચિક ભ્રમણનો બાર રાશિઓ પર પ્રભાવ


આજે 11 ઓક્ટોબર, 2018ના રોજ 19.18 કલાકે ગુરુ મહારાજ તુલા રાશિમાંથી વૃશ્ચિક રાશિમાં પ્રવેશ કરી રહ્યાં છે. અહીં ગુરુ 5 નવેમ્બર, 2019 સુધી ગોચર ભ્રમણ કરશે. આ દરમિયાન વચ્ચે 29 માર્ચ, 2019  થી 23 એપ્રિલ, 2019ના આશરે 24 દિવસ જેટલાં ટૂંકા ગાળા માટે ધનુ રાશિમાં ભ્રમણ કરશે. પરંતુ બાકીના સમયગાળામાં ગુરુ વૃશ્ચિક રાશિમાં જ ભ્રમણ કરશે. આથી વત્તે-ઓછે અંશે આ ગુરુનું વૃશ્ચિક ભ્રમણ જ કહેવાશે.

જ્યોતિષશાસ્ત્રમાં ગુરુને 'જીવ' કહ્યો છે. તે જ્યાંથી પણ પસાર થાય તે ભાવને 'જીવિત' કરી દે છે. જીવનની જે પણ બાબતોને સ્પર્શે તેમાં પ્રાણ ફૂંકી દે છે. આવાં નવેય ગ્રહોમાં નિતાંત શુભ એવાં ગુરુનું વૃશ્ચિક રાશિમાં ગોચર ભ્રમણ બારેય રાશિઓને કેવું ફળ આપશે તે જોઈએ.

અહીં નોંધવું જરૂરી છે કે નીચે વર્ણવેલ ફળ સ્થૂળ છે. સૂક્ષ્મ ફળનો આધાર વ્યક્તિગત કુંડળીમાં રહેલા ગ્રહો, દશા-મહાદશા, અષ્ટકવર્ગમાં જે-તે સ્થાનને મળેલાં બિંદુઓ વગેરે પર રહેલો છે.

મેષ: મેષ રાશિને ગુરુ અષ્ટમસ્થાનેથી ભ્રમણ કરશે. જીવન અને વ્યક્તિત્વમાં ઘણાં બદલાવ આવી શકે છે. વિચારો, માન્યતાઓ અને નૈતિક મૂલ્યોમાં ફેરફાર થવાની સંભાવના રહે. જીવનની ગુપ્ત, અજાણી અને રહસ્યમય બાબતોને જાણવાની જીજ્ઞાસા જાગે. અધ્યાત્મ વેદાંત અને ગૂઢ વિદ્યાઓનું અધ્યયન શક્ય બને. ભવિષ્ય સૂચક જ્ઞાન, સ્વપ્ન કે સંકેત મળી શકે છે. અણધારી ઘટનાઓ ઘટી શકે છે. વારસાગત અથવા ગુપ્ત ધનલાભ થવાની શક્યતા રહે. જીવનસાથી દ્વારા પણ ધનલાભ થઈ શકે છે. વીમા અને વ્યાજની રકમ સહાયરૂપ બને. દૂરના સ્થળની યાત્રાથી જીવનમાં પરિવર્તન આવી શકે છે. વિદેશયાત્રા આડેનાં અવરોધો દૂર થાય. સંશોધન કાર્ય સાથે જોડાયેલાં જાતકોને લાભ થવાની સંભાવના રહે. કુટુંબમાં સુખ અને સૌહાર્દનું વાતાવરણ બની રહે. નવી સ્થાવર મિલકત કે વાહનની ખરીદી થઈ શકે. આરોગ્ય બાબતે સતર્ક રહેવું. સગર્ભા સ્ત્રીઓએ વિશેષ કાળજી રાખવી. પિતાના સ્વાસ્થ્યની કાળજી લેવી.

વૃષભ: વૃષભ રાશિને ગુરુ સપ્તમસ્થાનેથી ભ્રમણ કરશે. અપરિણીતોની પ્રતીક્ષાનો અંત આવવાની સંભાવના છે. લગ્ન થઈ શકે છે અથવા વિજાતીય પાત્રનું સાહચર્ય પ્રાપ્ત થાય. પ્રેમીજનોને લગ્ન માટે માતા-પિતાના આશીર્વાદની પ્રાપ્તિ થાય. પરિણીતોને જીવનસાથીના સહયોગની પ્રાપ્તિ થાય. જીવનમાં આશા, ઉમંગ અને ઉત્સાહનો સંચાર થાય. સ્વનો વિકાસ સાધી શકાય. શરીરમાં મેદવૃદ્ધિ થઈ શકે છે. કોઈ નવો વ્યવસાય શરૂ કરવા ઈચ્છતા હો તો આ સમય યોગ્ય રહે. વ્યવસાય સંબંધી યાત્રાઓ થઈ શકે છે. વ્યાવસાયિક ભાગીદારી રચાવાની સંભાવના રહે. આર્થિક સુખ-સમૃદ્ધિમાં વધારો થાય. એક કરતાં વધુ સ્ત્રોતથી આવક થવાની સંભાવના રહે. મિત્રોથી ધનલાભ થઈ શકે છે. લાંબા સમયથી સેવેલી ઈચ્છાઓની પૂર્તિ થાય. જાહેર જીવનમાં માન-સન્માન અને પ્રતિષ્ઠાની પ્રાપ્તિ થઈ શકે છે. ભાઈ-બહેનો મદદરૂપ બને. લાભદાયી ઓળખાણો થઈ શકે છે. મોજ-શોખની પળોમાં સમય વ્યતીત થાય.

મિથુન: મિથુન રાશિને ગુરુ ષષ્ઠમસ્થાનેથી ભ્રમણ કરશે. મોસાળપક્ષથી લાભ થવાની સંભાવના રહે. નોકરીના સ્થળના વાતાવરણમાં સુધારાનો અનુભવ થાય. નોકરીમાં પ્રમોશન મળી શકે છે. વિદેશ સાથેના વ્યવસાયથી લાભ થવાની સંભાવના રહે. સમગ્ર ધ્યાન કારકીર્દિ પર કેન્દ્રિત રહેવાની સંભાવના છે. વિદ્યાર્થીઓને સ્પર્ધાત્મક પરીક્ષામાં સફળતાની પ્રાપ્તિ થઈ શકે છે. આરોગ્ય બાબતે વિશેષ કાળજી લેવી જરૂરી બને. કુશળ ડોક્ટર સાથે મુલાકાત થાય અથવા સારી અને યોગ્ય સારવાર મળી રહે. મિત્રો બનાવવા બાબતે સાવધ રહેવું જરૂરી બને. શત્રુઓ અને હરીફો મૂશ્કેલી પેદા કરી શકે છે. જીવનસાથીના દુર્વ્યવહારથી મન અશાંતિ અનુભવે. જીવનસાથી પાછળ નાણાકીય વ્યય થવાની સંભાવના રહે. ઋણમાંથી ધીરે-ધીરે મુક્તિ મળી શકે છે. સહેલાઈથી નવી લોનની પ્રાપ્તિ થઈ શકે. મનમાં રહેલાં ભય અને અશાંતિ તેમજ જવાબદારીઓનો સામનો પુરુષાર્થના બળે કરી સફળતાની પ્રાપ્તિ કરી શકાય.

કર્ક: કર્ક રાશિને ગુરુ પંચમસ્થાનેથી ભ્રમણ કરશે. વિવાહિત યુગલોને સંતાનપ્રાપ્તિનું સુખ મળે. સંતાનની પ્રગતિ થઈ શકે છે. વડીલોને પૌત્ર-પૌત્રીસુખની પ્રાપ્તિ થાય. વિદ્યાર્થીઓ અભ્યાસ પર ધ્યાન કેન્દ્રિત કરી શકે. અભ્યાસમાં સફળતાની પ્રાપ્તિ થાય. ઉચ્ચ અભ્યાસ બાબતે અનુકૂળતાઓનું સર્જન થાય. સર્જનાત્મકતા, બૌદ્ધિકતા અને પ્રતિભામાં વધારો થાય. જીવનમાં પ્રેમનું આગમન થઈ શકે છે. વૃશ્ચિક રાશિમાં ગુરુનું ભ્રમણ પ્રેમસંબંધને ગુપ્ત રાખવાનું વલણ રખાવે. શેરબજારથી લાભ થવાની સંભાવના છે. મિત્રવર્તુળમાં વૃદ્ધિ થવાની શક્યતા રહે. જૂના મિત્રો સાથે ફરી મિલન થઈ શકે. આવકમાં વધારો થાય. સુખ-સમૃદ્ધિમાં વૃદ્ધિ થાય. મંત્રોના જાપ અને તત્વજ્ઞાન માટેની રુચિ વધે. ધાર્મિક અને આધ્યાત્મિક બાબતોને લગતો અભ્યાસ થઈ શકે. સામાજીક માન-પ્રતિષ્ઠામાં વધારો થાય. મનોરંજન આપતી પ્રવૃતિઓ પાછળ સમય વ્યતીત થાય. લાંબા સમયથી સેવેલાં સપનાઓ અને ઈચ્છાઓની પૂર્તિ શક્ય બને.

સિંહ: સિંહ રાશિને ગુરુ ચતુર્થસ્થાનેથી ભ્રમણ કરશે. ઘર અને માતા પર ધ્યાન કેન્દ્રિત બને. નવી સ્થાવર મિલકત કે વાહનની ખરીદી થઈ શકે. ઘરમાં રહીને કામ કે અભ્યાસ શક્ય બને અને એ રીતે ઘરમાં વધુ રહેવાના સંજોગો ઊભા થાય. ઘરમાં પૂજા કે ધાર્મિક કાર્યો થઈ શકે છે. જૂના ઘરનું નવીનીકરણ શક્ય બને. પૈતૃક સંપતિને લગતાં વિવાદોનું શમન થાય. ઘર માટે સુખ-સગવડના સાધનોની ખરીદી થાય. ઘરમાં પ્રતિષ્ઠિત લોકોની આવ-જા રહે અથવા નવા સભ્યનો ઉમેરો થાય. ઘરમાં શાંતિ અને સલામતીની અનુભૂતિ થાય. વિદેશ રહેતાં લોકોને વતનની મુલાકાત લેવી શક્ય બને. નોકરી-વ્યવસાય બાબતે નવી તકોનું નિર્માણ થાય. નવા સાહસની શરૂઆત માટે આ સમય યોગ્ય રહે. વાહન સંભાળીને ચલાવવું જોઈએ. માતા સાથેનો સંબંધ મધુર બને. માતા દ્વારા વારસાગત સ્થાવર સંપતિની પ્રાપ્તિ થઈ શકે છે. જો કે માતાના આરોગ્યની કાળજી લેવી જરૂરી બને. કૌટુંબિક પરંપરા સાથે જોડાણ સાધી શકાય.

કન્યા: કન્યા રાશિને ગુરુ તૃતીયસ્થાનેથી ભ્રમણ કરશે. સાહસ, પરાક્રમ અને પુરુષાર્થથી જીવનની પરિસ્થિતિ સુધારવી શક્ય બને. ભાઈ-બહેનો અને મિત્રો સાથેના સંબંધ મધુર બને. ભાગ્યનો સહયોગ મળી રહે. ઉચ્ચ અભ્યાસ માટેની તકોની પ્રાપ્તિ થાય. અપરિણીતોના લગ્ન થવાની સંભાવના રહે. પરિણીતોના લગ્નજીવનમાંથી તણાવ દૂર થઈને મધુર વૈવાહિકજીવનની પ્રાપ્તિ થવાની સંભાવના રહે. નવી વ્યાવસાયિક ભાગીદારીમાં કાર્યની શરૂઆત થઈ શકે. નવા સંબંધો, નવા મિત્રો અને નવા પડોશીઓ બની શકે છે. માહિતી અને વિચારોના આદાન-પ્રદાન, કમ્યુનિકેશન, લેખન, પત્રવ્યવહાર, ચર્ચા અને સંવાદ માટે સમય લાભદાયી રહે. વિચારોની અભિવ્યક્તિ સરળ બને. યાત્રાઓ, સ્થળાંતર કે બદલી થઈ શકે છે. ધાર્મિક યાત્રાનું આયોજન થઈ શકે. પિતા માટે આ સમય લાભદાયી રહે. જ્ઞાન અને આવડતમાં વૃદ્ધિ થઈ શકે છે. જીવન પ્રત્યેનો દ્રષ્ટિકોણ વિશાળ બને અને વધુ ખુલ્લાં દિલે વિચારી શકો.

તુલા: તુલા રાશિને ગુરુ દ્વિતીયસ્થાનેથી ભ્રમણ કરશે. આર્થિક સુખ-સમૃદ્ધિમાં વધારો થાય. નાણાકીય બચત અને રોકાણો અંગે વિચારવા માટે આ સમય શુભ રહે. કુટુંબની સુખ-શાંતિમાં વધારો થાય. કુટુંબમાં નવા સભ્ય કે સંતાનનો ઉમેરો થઈ શકે છે. કુટુંબમાં માંગલિક પ્રસંગોની ઉજવણી થઈ શકે. નવા કાર્યોની શરૂઆત થઈ શકે. અટકેલાં કાર્યો પૂર્ણ થતાં જણાય. નોકરી-વ્યવસાય માટે સમય અનુકૂળ રહે. નોકરીમાં પ્રમોશન મળી શકે છે કે નવી નોકરી મળી શકે છે. પગારમાં વધારો થઈ શકે છે. ઉપરી અધિકારીઓ અને સહકર્મચારીઓના સાથ-સહકારની પ્રાપ્તિ થાય. વાણીની મીઠાશમાં વધારો થાય. શત્રુઓ અને હરીફોનો નાશ થાય. મોસાળપક્ષના સુખની પ્રાપ્તિ થાય. સ્વાદિષ્ટ ભોજનનો આનંદ માણી શકાય. કોર્ટ-કચેરીના કેસોમાં સફળતા મળવાની શક્યતા રહે. આરોગ્યની તંદુરસ્તીમાં વધારો થાય. લોનની અરજી કરવા માટે સમય અનુકૂળ રહે. વિદ્યાર્થીઓને અભ્યાસ માટે સમય લાભદાયી નીવડે.

વૃશ્ચિક: વૃશ્ચિક રાશિને ગુરુ પ્રથમસ્થાનેથી ભ્રમણ કરશે. આત્મવિશ્વાસ અને પરિપક્વતામાં વૃદ્ધિ થાય. સ્વાસ્થ્યમાં સુધારાનો અનુભવ થાય. નિરાશાના વાદળો વિખેરાય અને જીવનમાં આનંદનો સંચાર થાય. દેખાવ દિપ્તીવંત બને. શરીરમાં મેદવૃદ્ધિ થવાની શક્યતા રહે, પરંતુ દેખાવ પ્રત્યે સભાનતા આવે અને ડાયેટીંગ-યોગ-કસરત વગેરેની શરૂઆત થાય. વ્યક્તિત્વમાં નવી ઉર્જાનો સંચાર થાય. વ્યક્તિત્વના વિકાસ માટે આ સમયનો મહત્તમ લાભ લેવો જોઈએ. અપરિણીતોના લગ્ન થવાની સંભાવના પ્રબળ બને. પરિણીતોનું વૈવાહિકજીવન સ્નેહસભર બને. સંતાનસુખની પ્રતીક્ષાનો અંત આવે. સંતાનના જન્મ અને પ્રેમની પ્રાપ્તિ થઈ શકે. વ્યાવસાયિક ભાગીદારી રચવી શક્ય બને. વિદ્યાર્થીઓને અભ્યાસમાં આગળ વધવાની તકોનું નિર્માણ થાય. ધાર્મિક અને આધ્યાત્મિક બાબતો અંગેની રુચિમાં વધારો થાય. સામાજીક માન-સન્માન અને પ્રતિષ્ઠામાં વધારો થાય. મન આનંદમાં રહે.

ધનુ: ધનુ રાશિને ગુરુ બારમાસ્થાનેથી ભ્રમણ કરશે. શુભ કાર્યો પાછળ નાણાકીય ખર્ચ વધવાની સંભાવના રહે. આવક કરતાં જાવકનું પ્રમાણ વધુ રહેવાની સંભાવના છે. ઘર-પરિવાર, સંતાન, અભ્યાસ, માંગલિક પ્રસંગો, ધાર્મિક કાર્યો કે દાન-ધર્માદા જેવા શુભ હેતુ પાછળ ધનનો ઉપયોગ થાય. ધન ઉપાર્જન હેતુ ઘરથી દૂર જવાની સંભાવના રહે. પ્રારબ્ધના સાથની પ્રાપ્તિ હેતુ પુરુષાર્થમાં વૃદ્ધિ કરવી પડે. મોસાળપક્ષ સાથેના સંબંધો મજબૂત બને. દૂરના સ્થળની કે વિદેશની યાત્રા થવાની સંભાવના રહે. વતનની મુલાકાત લેવી શક્ય બને. માનસિક રીતે તણાવ કે ચિંતાનો અનુભવ થઈ શકે છે. નવા જમીન, મકાન કે વાહનની ખરીદી થઈ શકે. શત્રુઓ અને હરીફો પર વિજયની પ્રાપ્તિ થાય. આધ્યાત્મિક બાબતો પ્રત્યેની રુચિમાં વધારો થાય. ધ્યાન દ્વારા મનના ઊંડાણને સ્પર્શી શકાય. એકાંતમાં કે આશ્રમમાં ધ્યાન-યોગ-ચિંતન ધરવાથી સુખાનિભૂતિની પ્રાપ્તિ થાય. આરોગ્યની કાળજી લેવી જરૂરી બને.

મકર: મકર રાશિને ગુરુ એકાદશભાવમાંથી ભ્રમણ કરશે. આવકમાં વધારો થાય. એક કરતાં વધુ સ્ત્રોતથી આવક થવાની સંભાવના રહે. વ્યવસાયમાં નફામાં વૃદ્ધિ થવાની શક્યતા રહે. વ્યાવસાયિક ભાગીદારીમાં સાનુકૂળતા રહે. નોકરીમાં પ્રમોશન મળવાની સંભાવના રહે. ભાઈ-બહેનો, મિત્રો અને પડોશીઓ સાથેના સંબંધો મધુર બને. મિત્રવર્તુળમાં વધારો થાય. લાભદાયી ઓળખાણો થવાની શક્યતા રહે. ક્લબ, ગ્રુપ કે સંસ્થાઓ સાથે જોડાવાના પ્રસંગ ઉદ્ભવે. લગ્નજીવન સુખી રહે. અપરિણીતોના લગ્ન થવાની સંભાવના રહે. જીવનમાં પ્રણય સંબંધનું આગમન થઈ શકે છે. સંતાનની સુખાકારી ઉત્તમ રહે. સંતાન ઈચ્છુક દંપતિઓને સંતાન પ્રાપ્તિ થઈ શકે છે. શેરબજારથી લાભ થવાની સંભાવના રહે. સાહસ અને પરાક્રમમાં વૃદ્ધિ થાય. વિદ્યાર્થીઓને અભ્યાસ માટે ઉત્તમ સમય રહે. લાંબા સમયથી સેવેલી ઈચ્છાઓ, મહાત્વાકાંક્ષાઓ અને સપનાઓની પૂર્તિ થતી જણાય. મંત્ર જાપ કરવાથી લાભ રહે.

કુંભ: કુંભ રાશિને ગુરુ દસમસ્થાનેથી ભ્રમણ કરશે. નોકરી-વ્યવસાય ક્ષેત્રે નવી તકોની પ્રાપ્તિ થઈ શકે છે. નવી નોકરીની પ્રાપ્તિ માટે કે નોકરી બદલવા માટે આ સમય યોગ્ય રહે. નોકરી-વ્યવસાયમાં સફળતાની સીડીઓ સર કરી શકાય. કામની જવાબદારી કે કામના બોજામાં વધારો થઈ શકે છે. કામને લીધે માન-સન્માન કે પુરસ્કારની પ્રાપ્તિ થઈ શકે. નોકરી-વ્યવસાય અર્થે મુસાફરી થઈ શકે છે. આર્થિક બાબતો માટે સમય લાભદાયી નીવડે. નાણાકીય આવકમાં વધારો થાય અને બચત પણ થઈ શકે. કૌટુંબિક ક્ષેત્રે સુખ-શાંતિનુ વાતાવરણ રહે. જમીન, મકાન અને વાહનથી લાભ થવાની સંભાવના રહે. ઘરની સાજ-સજાવટનું કાર્ય થઈ શકે. માતા-પિતાના સુખ, માન-સન્માન કે પદ-પ્રતિષ્ઠામાં વધારો થઈ શકે છે. શત્રુઓ અને હરીફવર્ગ પર વિજય મેળવી શકાય. વિદ્યાર્થીઓને સ્પર્ધાત્મક પરીક્ષામાં સફળતાની પ્રાપ્તિ થઈ શકે. રાજકીય ક્ષેત્રમાં રહેલાં લોકો માટે સમય અનુકૂળ રહે.

મીન: મીન રાશિને ગુરુ નવમસ્થાનેથી ગોચર ભ્રમણ કરશે. ભાગ્યનો સાથ મળી રહેશે. ઉચ્ચ વિચારો અને ઉચ્ચ અભ્યાસની પ્રાપ્તિ શક્ય બને. જ્ઞાનપ્રાપ્તિ અને બૌદ્ધિક બાબતો અંગેની જીજ્ઞાસા તીવ્ર બને. યાદશક્તિ અને ગ્રહણશક્તિ તેજ બને. કલા, પ્રતિભા અને સર્જનાત્મકતામાં વધારો થાય. ધર્મ અને અધ્યાત્મ પ્રત્યેની રુચિમાં વધારો થાય. ધાર્મિક સ્થળોની યાત્રા થઈ શકે. લાંબા અંતરની મુસાફરીનો યોગ બને. વિદેશયાત્રા માટે સમય અનુકૂળ રહે. સંતાનસુખની પ્રાપ્તિ થઈ શકે છે. વડીલોને પૌત્ર-પૌત્રીના સુખની પ્રાપ્તિ થાય. ભાઈ-બહેનો સાથેના સંબંધ મજબૂત બને. પિતા માટે આ સમય લાભદાયી રહે. નાણાકીય આવક અને ધન-સંપતિમાં વધારો થાય. દરેક પ્રકારના સાહસોમાં સફળતાની પ્રાપ્તિ થાય. શેરબજારથી લાભ રહે. જીવનમાં પ્રેમસંબંધનું આગમન થઈ શકે છે. સામાજીક માન-સન્માન અને પ્રતિષ્ઠામાં વૃદ્ધિ થાય. શિક્ષક, ગુરુ અને સંતના આશીર્વાદનો લાભ મળે.

August 20, 2018

પ્રિયંકા ચોપરાની સગાઈના સિતારા


હાલમાં હિંદી ફિલ્મ અભિનેત્રી પ્રિયંકા ચોપરા તેના અમેરિકન મિત્ર ગાયક-ગીતકાર નિક જોનસ સાથેની સગાઈના સમાચારોને લીધે ચર્ચામાં છે. શનિવાર, 18 ઓગસ્ટના રોજ બંનેએ સોશિયલ મિડીયા પર તેમનાં સગપણનો ઔપચારિક સ્વીકાર કર્યો. આ બાબતનું વિશ્લેષણ જ્યોતિષિક દ્રષ્ટિએ કરવું રસપ્રદ રહેશે. પ્રિયંકા મેષ જન્મલગ્ન અને વૃષભ જન્મરાશિ ધરાવે છે.

જન્મતારીખ: જુલાઈ 18, 1982
જન્મસમય: 12.30 am
જન્મસ્થળ: જમશેદપુર

જન્મલગ્ન કુંડળી 
પ્રિયંકા ચોપરાની કુંડળીમાં સપ્તમ વિવાહસ્થાનનો સ્વામી શુક્ર છે. જે તૃતીયસ્થાનમાં મિથુન રાશિમાં બુધ અને રાહુ સાથે યુતિમાં છે. શુક્ર સુંદર, દેખાવડાં અને કલામાં અભિરુચિ ધરાવનાર જીવનસાથી પ્રદાન કરે છે. નિક ગાયન અને અભિનય કળામાં કુશળ છે. બુધ વાણી અને લેખનનો કારક ગ્રહ છે. સપ્તમેશ શુક્રની બુધ સાથેની યુતિને લીધે મધુર અવાજ અને ગીતો લખી શકવાની કુશળતા ધરાવનાર જીવનસાથી મળવાની સંભાવના ઉભી થઈ છે. આ સાથે જ સપ્તમેશ શુક્ર રાહુ સાથે પણ યુતિમાં છે. રાહુ વિદેશી લોકો, ભાષા અને વસ્તુઓનો કારક ગ્રહ છે. સપ્તમસ્થાન કે સપ્તમેશ સાથે રહેલો રાહુ વિદેશી કે અલગ ધર્મ અથવા જ્ઞાતિની, પોતાનાં કરતાં અલગ રીતે ઉછેર પામેલી કે અલગ રહેણીકરણી ધરાવતી વ્યક્તિ સાથે લગ્ન કરાવે છે. આ ઉપરાંત સપ્તમસ્થાનમાં ગુરુ રહેલો છે, જે દ્વાદશભાવનો સ્વામી છે. દ્વાદશભાવ પરદેશ અથવા દૂરનું અજાણ્યું સ્થળ સૂચવે છે. બારમા ભાવના સ્વામીની સપ્તમસ્થાનમાં હાજરી વિદેશી વ્યક્તિ સાથે લગ્ન કરાવી શકે. ગુરુને પરંપરા અને રીતરિવાજો પસંદ છે. આથી લગ્ન માતા-પિતા અને પરિવારની સંમતિથી પરંપરાગત રિવાજોને અનુસરીને કરાવે. સમાચારો અનુસાર બંનેએ સગાઈની વિધિ પણ હિંદુ-પંજાબી રીતરિવાજો અનુસાર પરિવારજનો અને મિત્રોની હાજરીમાં કરી. આ સંપૂર્ણપણે ગુરુનો પ્રભાવ છે. શુક્ર-રાહુની યુતિ પ્રેમલગ્ન કરાવે છે. 

નવમાંશ કુંડળી 
વિવાહ માટે જોવામાં આવતી વર્ગકુંડળી નવમાંશમાં લગ્નમાં સ્વગૃહી શુક્ર સપ્તમસ્થાનમાં રહેલાં બુધ સાથે પ્રતિયુતિમાં છે. જે ફરીથી શુક્ર અને બુધના ગુણો ધરાવનાર જીવનસાથી મળવાની સંભાવનાને પુષ્ટ કરે છે. નવમાંશમાં લગ્નસ્થાનમાં સ્વગૃહી શુક્રએ પ્રિયંકાને પણ સુંદર દેખાવ અને ગાયન-અભિનય કળા પ્રદાન કરેલ છે. સપ્તમસ્થાનમાં રહેલો બુધ બારમા પરદેશભાવમાં રહેલાં મંગળ સાથે પરિવર્તન યોગમાં છે (મંગળની રાશિમાં બુધ અને બુધની રાશિમાં મંગળ). સપ્તમેશ અને દ્વાદશેશનો પરિવર્તનયોગ પરદેશી વ્યક્તિ સાથે લગ્ન થવાની સંભાવનાને બળવત્તર કરે છે.

ગ્રહોમાં બુધ યુવરાજ છે. જ્યારે સપ્તમસ્થાનમાં બુધની રાશિ હોય અથવા સાતમે કે સપ્તમસ્થાનમાં બુધ રહેલો હોય ત્યારે સમાન વયની કે પોતાનાથી ઉંમરમાં નાની અથવા દેખાવ કે વિચારોથી યુવાન વ્યક્તિ સાથે લગ્ન કરાવે છે. પ્રિયંકા ચોપરાની જન્મલગ્ન કુંડળીમાં સપ્તમેશ શુક્ર બુધની રાશિમાં બુધ સાથે યુતિમાં છે. ઉપરાંતમાં નવમાંશ કુંડળીના સપ્તમસ્થાનમાં પણ બુધ રહેલો છે. નિક જોનસનો જન્મ સપ્ટેમ્બર 1992માં થયો છે અને પ્રિયંકાથી આશરે 10 વર્ષ નાની વય ધરાવે છે. નાની ઉંમર તો બરાબર પરંતુ ઉંમરમાં આટલો મોટો તફાવત શા માટે? જુઓ લગ્નકુંડળીમાં શનિ મહારાજ છઠ્ઠા સ્થાને રહીને સપ્તમેશ શુક્ર પર દ્રષ્ટિ કરી રહ્યાં છે. નવમાંશમાં પણ શનિની દ્રષ્ટિ સપ્તમસ્થાન અને સપ્તમેશ મંગળ પર પડી રહી છે. શનિ હંમેશા ઉંમર, દેખાવ કે સ્વભાવમાં તફાવતવાળા પતિ કે પત્ની આપે છે. એવાં પતિ કે પત્ની કે જેને આપણે કજોડું પણ કહી શકીએ. આ જ શનિની દ્રષ્ટિને લીધે પ્રિયંકાના લગ્નમાં વિલંબ થયો છે. પ્રિયંકાની વય હાલ 36 વર્ષની છે, જે ભારતીય માપદંડ અનુસાર મોડાં લગ્નની શ્રેણીમાં મૂકી શકાય. સપ્તમસ્થાન કે સપ્તમેશ સાથે શનિનો સંબંધ લગ્ન મોડાં કરાવે છે.

જન્મલગ્ન કુંડળીમાં સપ્તમેશ શુક્ર સાથે યુતિમાં રહેલો બુધ તૃતીય અને ષષ્ઠમ ખાડાના ભાવનો સ્વામી છે. શુક્રની રોગસ્થાનના સ્વામી બુધ સાથેની યુતિ જીવનસાથીનું આરોગ્ય નરમ-ગરમ રખાવી શકે. આ ઉપરાંત બંને વચ્ચે દલીલો થવાની શક્યતા રહે. 

ચંદ્રલગ્ન કુંડળી 
ચંદ્રલગ્ન કુંડળી જોતાં સપ્તમેશ મંગળ પંચમ પ્રણયસ્થાન સ્થિત છે. જે પ્રેમલગ્ન થવાની શક્યતા સૂચવે છે. સપ્તમેશ મંગળ સાથે શનિની યુતિ અને સપ્તમભાવ પર શનિની દ્રષ્ટિ ફરી મોડાં લગ્ન થવાનો સંકેત આપે છે. નવમાંશ કુંડળીમાં થઈ રહેલો મંગળ-બુધ પરિવર્તન યોગ હકીકતમાં ચંદ્રલગ્ન કુંડળીના પંચમેશ અને સપ્તમેશ વચ્ચેનો પરિવર્તનયોગ છે. પંચમેશ અને સપ્તમેશનો કોઈ પણ પ્રકારે સંબંધ પ્રેમલગ્ન કરાવે છે. નવમાંશ કુંડળીના સપ્તમ અને દ્વાદશભાવ સંકળાવાથી પ્રેમસંબંધ વિદેશમાં અથવા તો દૂરના સ્થળે આપ્યો. જો કે મંગળ અને બુધ શત્રુગ્રહો હોવાથી પ્રેમસંબંધોમાં ક્યારેક નિષ્ફળતા પણ આપે છે. ચંદ્રલગ્ન કુંડળીના સપ્તમેશ મંગળ અને લગ્નના કારક શુક્રનું  દ્વિસ્વભાવ રાશિમાં હોવું બે સંબંધો કે બે પ્રેમ લગાવનો નિર્દેશ કરે છે. જન્મલગ્નકુંડળીનો સપ્તમેશ શુક્ર છે અને લગ્નનો કારક પણ શુક્ર છે, જે દ્વિસ્વભાવ રાશિમાં છે. જે ફરી એક કરતાં વધુ સંબંધ કે વધુ લાગણીઓનાં જોડાણ જીવનમાં થયા હોવાની શક્યતાને પુષ્ટ કરે છે.   

હાલમાં પ્રિયંકાને ગુરુની વિંશોત્તરી મહાદશા ચાલી રહી છે. મહાદશાધિપતિ ગુરુ સપ્તમસ્થાનમાં સ્થિત છે અને સપ્તમેશ શુક્ર પર દ્રષ્ટિ કરી રહ્યો છે. આથી ગુરુની દશા લગ્ન કરાવી આપવા માટે પ્રબળ દાવેદાર છે. ગોચરમાં સપ્તમ તુલા રાશિમાંથી ગુરુનું ભ્રમણ થઈ રહ્યું છે. વળી આ ગોચરનો ગુરુ લગ્નના કારક અને સપ્તમેશ એવાં શુક્રથી ત્રિકોણરાશિમાં ભ્રમણ કરી રહ્યો છે અને તેના પર દ્રષ્ટિ પણ કરી રહ્યો છે. ઓક્ટોબરથી ગુરુ વૃશ્ચિક રાશિમાં ભ્રમણ કરશે, જે ચંદ્રલગ્નથી સપ્તમસ્થાન છે. સપ્તમસ્થાનમાંથી ગુરુનું ગોચર ભ્રમણ પ્રબળ લગ્નયોગ આપે છે. દશા અને ગોચર સંપૂર્ણપણે અનુકૂળ ગોઠવાયાં છે. જુલાઈ 2018થી ગુરુની મહાદશામાં સપ્તમેશ અને લગ્નના કારક શુક્રની અંતર્દશા શરૂ થઈ છે. ગ્રહોની ચાલની આ ગોઠવણી પ્રિયંકાના લગ્નની શરણાઈઓ વગાડવાં સંપૂર્ણપણે સજ્જ છે. 

August 14, 2018

કેવું અને ક્યાં મકાન મળે?


જન્મકુંડળીમાં ચતુર્થસ્થાન સ્થાવર સંપતિ, જમીન અને મકાનનો નિર્દેશ કરે છે. ચતુર્થસ્થાનમાં રહેલાં કે તેની સાથે સંકળાયેલાં ગ્રહો અનુસાર કેવું અને ક્યાં મકાન મળે તે જોઈએ. 

સૂર્ય: રાજાના મહેલ જેવું ઘર, શહેર-વિસ્તાર-સોસાયટીના કેન્દ્રમાં રહેલું ઘર, સરકારી નિવાસસ્થાન, પ્રખ્યાત વિસ્તારમાં ઘર, પ્રસિદ્ધ વ્યક્તિ-રાજકારણી-સરકારી અમલદારની બાજુમાં ઘર, ઘરની આસપાસ ડોક્ટર-વૈદ્ય-હોસ્પિટલ, સરકારી કચેરીની નજીક ઘર, મોટું ઘર, બહુમાળી મકાન.

ચંદ્ર: સમુદ્ર, તળાવ, નદી, જળાશયની નજીક ઘર, ઘરમાં કૂવો કે બોર હોય, ઘરનાં બોરમાં કોઈ દિવસ પાણી ન ખૂટે, પૂરતાં પ્રમાણમાં પાણીની સગવડતા ધરાવતું મકાન, પડોશમાં સ્ત્રીઓની સંખ્યા વધુ, ગર્લ્સ હોસ્ટેલ-પ્રસુતિગૃહની બાજુમાં ઘર, દૂધની ડેરી કે પીણાંઓની દુકાન નજીક, ઘરની નજીક શિવાલય હોય, મેન્ટલ હોસ્પિટલ કે મનોચિકિત્સકની નજીક. 

મંગળ: પોલીસચોકી કે લશ્કરી છાવણીની નજીક નિવાસસ્થાન, કારખાનાં-વીજળીઘર-ફાયરબ્રિગેડની નજીક, બ્લડબેંક કે સર્જનથી નજીક નિવાસ, ગેરેજ અથવા મિકેનીક-એંજીનીયરની આસપાસ હાજરી.

બુધ: ઘરમાં જ ઓફિસ કે દુકાન હોય, વ્યાપારી વિસ્તારમાં ઘર, વ્યાપારી સંકુલ, શેરમાર્કેટ, કરિયાણા, કાપડની દુકાનની નજીક, આસપાસ શોપિંગ સેન્ટર કે મોલ હોવાની શક્યતા, તાર-ટપાલ-ટેલિફોન-કુરિયરની ઓફિસ નજીક.

ગુરુ: વિશાળ ઘર, ઘર નજીક મંદિર હોય, ઘર આસપાસ શાળા-કોલેજ-ટ્યુશન ક્લાસીસ-વિદ્યાસંકુલ હોય. જરૂરિયાત કરતાં મોટું ઘર, નજીકમાં ધર્મશાળા કે ધર્માદાની જગ્યા, બેન્કથી નજીક. 

શુક્ર: સુંદર, સુશોભિત, વૈભવી ઘર, સ્વચ્છ ઘર, નજીકમાં સિનેમાહોલ, નાટ્યગૃહ કે બ્યુટીપાર્લર હોવાની સંભાવના, સુંદર બગીચો ધરાવતું મકાન, કલાત્મક બાંધણી કે સુશોભન કરેલું ઘર, ઘરેણાંની દુકાન નજીક, નર્તકી-અભિનેત્રી-મોડેલ-સ્ત્રીઓની નજીક ઘર.

શનિ: જૂનું ઘર, જર્જરીત અને પડતર ઘર, જૂની ઢબનું બાંધકામ ધરાવતું મકાન, ઘર આસપાસ ઝૂંપડપટ્ટી, ગંદુ નાળું કે ગટર હોવાની સંભાવના, આસપાસ કારીગર વર્ગ મળી રહે, તેલ, કોલસા કે ચાની દુકાન નજીક, પડોશમાં વૃદ્ધ લોકોની હાજરી, વૃદ્ધાશ્રમની નજીક, વારસાગત મળેલું ઘર.

રાહુ: ગેરકાનૂની બાંધકામ ધરાવતું, અધૂરાં કે ગેરકાનૂની દસ્તાવેજો ધરાવતું મકાન, કોર્ટ કેસવાળું મકાન, ઘરના લોકોથી ખાનગી રાખીને ખરીદેલું ઘર, આસપાસ ગુંડાગીરી કે અનીતિના અડ્ડા ચાલતાં હોય, જુગાર-મટકાં ચાલતાં હોય, કબ્રસ્તાન કે સ્મશાન નજીક ઘર.

કેતુ: જૂનું તૂટેલું મકાન, દોષવાળી જગ્યા, ભૂતબંગલા, અવાવરું જગ્યાએ ઘર હોય, ઝાડી-જંગલ-કાંટાળા ઝાડ વચ્ચે ઘર, શુભ દ્રષ્ટ કેતુ હોય તો આસપાસ આધ્યાત્મિક સ્થળ, આશ્રમ, ધ્યાન ધરવાની જગ્યા હોય. 

August 10, 2018

કાળસર્પયોગ મંત્ર


જન્મકુંડળીમાં બધાં ગ્રહો રાહુ-કેતુની મધ્યમાં સ્થિત હોય ત્યારે કાળસર્પયોગનું નિર્માણ થાય છે. કાળસર્પયોગથી ગ્રસિત જાતકનું જીવન સંઘર્ષ અને ઉતાર-ચડાવથી ભરેલું રહે છે. આમ છતાં જે જાતકો સંઘર્ષથી હાર નથી માનતા તેઓ સફળતાની સીડીઓ સર કરે છે. નીચે કેટલાંક મંત્રો આપ્યાં છે જેનાં નિત્ય જાપ કરવાથી કાળસર્પયોગની નકારાત્મક અસર હળવી કરી શકાય છે.

॥ नवनाग स्तोत्र ॥

अनंत वासुकिं शेषं पद्मनाभमं च कम्बलं ।
शंखपालं धृतराष्ट्रं तक्षकं कालियं तथा ॥
एतानि नवनामानि नागानां च महात्मनां ।
सायंकालेपठेन्नित्यं प्रात:काले विशेषत: ॥
तस्य विषभयं नास्ति सर्वत्र विजयी भवेत ॥

નવનાગ સ્તોત્ર

અનંતમ વાસુકિમ શેષમ પદ્મનાભમ ચ કમ્બલમ
શંખપાલમ ધૃતરાષ્ટ્રમ તક્ષકમ કાલિયમ તથા
એતાનિ નવનામાનિ નાગાનામ ચ મહાત્મનામ
સાયંકાલેપઠેન્નિત્યમ પ્રાત:કાલે વિશેષત:
તસ્ય વિષભયમ નાસ્તિ સર્વત્ર વિજયી ભવેત


नाग गायत्री मंत्र

ॐ नवकुलाय विद्महे विषदंताय धीमहि
तन्नो सर्प: प्रचोदयात ॥

નાગ ગાયત્રી મંત્ર

ૐ નવકુલાય વિદ્મહે વિષદંતાય ધીમહિ
તન્નો સર્પ: પ્રચોદયાત


राहु मंत्र

ॐ भ्रां भ्रीं भ्रौं स: राहवे नम: ॥

રાહુ મંત્ર

ૐ ભ્રામ ભ્રીમ ભ્રૌમ સહ રાહવે નમહ


केतु मंत्र

ॐ स्रां स्रीं स्रौं स: केतवे नम: ॥

કેતુ મંત્ર 

ૐ સ્રામ સ્રીમ સ્રૌમ સહ કેતવે નમહ  

નક્ષત્ર ગોચર ભ્રમણ અનુસાર શનિનું ફળ


નક્ષત્ર ગોચર ભ્રમણ અનુસાર શનિ કેવું ફળ આપશે? શનિ ગોચરમાં જે નક્ષત્રમાં ભ્રમણ કરી રહ્યો હોય ત્યાંથી ગણવાનું શરૂ કરીને તમારાં જન્મરાશિનાં નક્ષત્ર સુધી ગણતરી કરો. જે નક્ષત્ર સંખ્યા આવશે તેના આધારે નીચે મુજબ ફળ તંત્રવિદોએ દર્શાવેલ છે. (હાલ ગોચરમાં શનિ મૂળ નક્ષત્રમાંથી ભ્રમણ કરી રહ્યો છે. મૂળ નક્ષત્રથી તમારાં જન્મનક્ષત્ર સુધી ગણતરી કરી ફળ જાણો) નક્ષત્રના નામ અને ક્રમ જાણવા માટે જુઓ લેખ 'નક્ષત્ર'. 

1 નક્ષત્ર: શનિ મુખમાં, માનસિક ચિંતા અને કષ્ટ રખાવે પરંતુ સરવાળે કલ્યાણકારી

2-3 નક્ષત્ર: શનિ મુખદ્વારમાં, શારીરિક અસ્વસ્થતા રખાવે પરંતુ યોગ્ય ઈલાજથી સાજા થવાય.

4-5 નક્ષત્ર: શનિ આંખોમાં, લાભ, પ્રગતિ, સન્માન અને યશની પ્રાપ્તિ

6-7-8 નક્ષત્ર: શનિ મસ્તિષ્કમાં, રાજસન્માન, પ્રગતિ, બઢતી

9-10-11-12 નક્ષત્ર: શનિ ભુજાઓમાં, શારીરિક કષ્ટ, સાવધાની રાખવી જરૂરી

13-14-15-16-17 નક્ષત્ર: શનિ હ્રદયમાં, સુખ, વ્યવસાયમાં પ્રગતિ, લાભ, આવકમાં વધારો

18-19-20 નક્ષત્ર: શનિ જમણા પગમાં, પરાધીનતા, પરિશ્રમ

21-22-23 નક્ષત્ર: શનિ ડાબા પગમાં, પરિશ્રમ, કઠીન સમય, પરવશતા

24-25-26-27 નક્ષત્ર: શનિ પાનીમાં, પરિશ્રમ પણ એકંદરે ફળદાયી, સેવા કરે, ધર્મ-મોક્ષ-દાન કરે. શનિ અશુભ દ્રષ્ટ હોય તો વ્યસન, જુગાર કે બંધનને લીધે વ્યય થાય.   

બાર રાશિઓ અને સ્વાર્થીપણું


મેષ: સામાન્ય રીતે સ્વાર્થી હોતા નથી. પરંતુ તેમનો પહેલાં હું’, ‘પહેલાં મનેઅભિગમ તેમનાં વ્યક્તિત્વને સ્વાર્થી દર્શાવે છે.

વૃષભ: સારો સ્વભાવ ધરાવનાર હોય છે. પરંતુ ભૌતિકવાદી હોય છે. આળસુ પ્રકૃતિ હોવાને લીધે સહેલાં અને આરામદાયક રસ્તાઓ શોધે છે. જે ઘણીવાર તેમને લાલચુ અને સ્વાર્થી રીતે રજૂ કરે છે.

મિથુન: બાલિશ રીતે સ્વાર્થીપણું ધરાવે છે.

કર્ક: સામાન્ય રીતે નિ:સ્વાર્થી હોય છે. પરંતુ જો તેમનો રાશિસ્વામી ચંદ્ર પાપગ્રહ શનિથી પીડિત હોય તો ઘણાં સ્વાર્થી બની જાય છે.

સિંહ: નિ:સ્વાર્થી, ઉદાર અને બીજાને મદદ કરવા હંમેશા તત્પર હોય છે. પરંતુ તેમને આકર્ષણના કેન્દ્ર બનવું, સ્પોટલાઈટમાં રહેવું પસંદ હોય છે. જે તેમને સ્વાર્થી રીતે રજૂ કરે છે.

કન્યા: સ્વકેન્દ્રી હોય છે. તેઓ દુનિયા અને આસપાસની પરિસ્થિતિને સંપૂર્ણ અને ખામીરહિત જોવા માગે છે. આથી અન્યોની ટીકા કરવાનું વલણ ધરાવે છે. જે તેમને સ્વાર્થી રીતે રજૂ કરે છે.  

તુલા: પ્રમાદી, જિંદગીના દુ:ખભર્યા હિસ્સાને પસંદ કરતાં નથી. કોઈ પણ કાર્ય એકલાં કરવું પસંદ કરતાં નથી. કાર્યો માટે અન્યોના સાથ પર આધાર રાખવાની પ્રકૃતિ સ્વાર્થી રીતે રજૂ કરે છે. 

વૃશ્ચિક: અતિશયોક્તિ ધરાવનારી રાશિ છે. જે લોકો તેમને નથી ગમતાં તેમના માટે અતિસ્વાર્થી, ઈર્ષ્યાળુ અને શંકાશીલ હોય છે. જે લોકો ગમે છે તેમના માટે નિ:સ્વાર્થ થઈને પોતાને જીવ પણ હાજર કરી દે છે.

ધનુ: આર્થિક મદદ કરવામાં ઉદાર હોય છે. પરંતુ પોતાની સ્વતંત્રતાના ચાહક હોય છે. જે તેમનાં વ્યક્તિત્વને સ્વાર્થી રીતે રજૂ કરી શકે છે.

મકર: સ્વસુરક્ષા પ્રત્યે જાગૃત, હ્રદયથી વર્તવાને બદલે નિયમો અનુસાર વર્તે છે. બીજાં માટે જેટલું કામ કરવું પડે તેમ હોય કે કરવાની ફરજ હોય તેટલું જ કરે છે, એથી વધુ નહિ. જે તેમને સ્વાર્થી બનાવે છે. 

કુંભ: આદર્શો અને સામાજીક કારણ માટે નિ:સ્વાર્થ સેવા કરે. પરંતુ વ્યક્તિગત બાબતો માટે સ્વાર્થી બની શકે.

મીન: સારો સ્વભાવ ધરાવનારી નિ:સ્વાર્થ રાશિ છે. પરંતુ ઘણીવાર તેઓ પોતાની લાગણીઓ પર નિયંત્રણ રાખી શકતાં નથી. જે તેમને સ્વકેન્દ્રી અને સ્વાર્થી રીતે રજૂ કરી શકે.